Lia-Menon husi Diretór
Pe. Aderito da Costa, SDB
Bem-vindu ba website ofisiál Escola Secundária Santo António Teulale Baucau!
Ho laran ksolok tebes, ohin loron ami lansa ita-nia website ofisiál ne'e ba públiku. Ne'e mak pasu importante ida iha ita-nia jornada edukasaun nian atu hakat ba mundu dijitál, hodi tuir dezenvolvimentu teknolojia iha tempu ohin loron.
Website ne'e kria ho objetivu atu sai hanesan ponte komunikasaun ne'ebé di'ak, nakloke, no lalais entre eskola, inan-aman, estudante, no mós komunidade en jerál. Iha fatin ne'e, ita-boot sira bele asesu ba informasaun oioin ho fasil, hanesan Avizu / Anúnsiu eskola nian, Perfil Eskola, Matéria Eskolár, to'o akonpaña atividade estudante sira-nian liuhosi Jornál Parede Dijitál no programa Estrakurikulár.
Hanesan ita-nia lema, "Matenek, Fiar, no Virtude", ami fiar katak prezensa dijitál ida ne'e sei apoia maka'as prosesu aprendizajen, haburas koñesimentu, no haforsa ita-nia serbisu hamutuk nu'udar família boot ESSA Baucau nian. Liuhosi meiu ida ne'e mós, ami hakarak kontinua fornese edukasaun ne'ebé bazeia ba Fe, Matenek, no Dedikasaun hodi prepara ita-nia oan sira ba futuru ne'ebé nabilan.
Jornál Parede Dijitál
Jornál Parede Dijitál nu’udár plataforma media komunikasaun ho formatu dijitál, programa ne’e inklui introdusaun jornalizmu báziku iha eskola sira, enkoraja prátika hakerek, lee no kriasaun konteúdu dijitál hosi estudante sira. Jornál Parede Dijitál bele utilizadu atu hato’o informasaun ka notisiás, anúnsiu, no konteúdu relasiona ho atividades eskola.
